Wednesday, August 17, 2022
Home Blog

கர்ப்பிணி தாய்மார்களை வைத்திய சாலையில் அனுமதிப்பது தொடர்பில் வெளியாகிய முக்கிய அறிவித்தல்..!

தற்போதைய எரிபொருள் நெருக்கடியினால் அவசரமாக வைத்திய சாலையில் அனுமதிக்கப் படுவதற்கான வசதிகள் இல்லாத கர்ப்பிணித் தாய்மார்கள், பிரசவ திகதிக்கு சுமார் 15 நாட்களுக்கு முன்னதாக வைத்திய சாலையில் அனுமதிக்கப்பட வேண்டுமென மகப்பேறு மற்றும் பெண் நோயியல் நிபுணர்கள் நிறுவகம் தெரிவித்துள்ளது.


வீட்டில் பிரசவம் செய்வது தாய்க்கும் பிறந்த குழந்தைக்கும் ஆபத்தை விளைவிக்கும் என்று அவர்கள் சுட்டிக் காட்டுகின்றனர்.

இதேவேளை நாடு முழுவதும் கடந்த சில நாட்களாக வீடுகளில் பிரசவிப்பது அதிகரித்துள்ளதாக அரச குடும்ப சுகாதார சேவை உத்தியோகத்தர் சங்கம் தெரிவித்துள்ளது.


எரிபொருள் நெருக்கடிக்கு முகங்கொடுத்து வைத்திய சாலைகளுக்கு செல்வதில் உள்ள சிரமம் மற்றும் பணப் பிரச்சினை காரணமாக இந்த நிலை ஏற்பட்டுள்ளதாக சங்கத்தின் தலைவர் தேவிகா கொடித்துவக்கு தெரிவித்திருந்தமை குறிப்பிடத்தக்கது.

பாடசாலை வருகை தராது விட்டால் தனிப்பட்ட விடுமுறையில் பதியப்படும் என வற்புறுத்த எந்த அதிபருக்கும் அதிகாரமில்லை..

பாடசாலைகளுக்கு வருகை தராவிட்டால் ஆசிரியரின் தனிப்பட்ட விடுமுறையில் பதியப்படும் என்று மிரட்டல் விடுக்க எந்த அதிபருக்கும் கல்வி அமைச்சினால் அதிகாரம் வழங்கப்பட வில்லை என இலங்கை ஆசிரியர் சேவைகள் சங்கத்தின் செயலாளர் மகிந்த ஜயசிங்க தெரிவித்துள்ளார்.


கல்வி அமைச்சர், இவ்வாரம் ஆசிரியர்கள் தன்னார்வ அடிப்படையில் கடமைக்கு வருகை தருமாறு கோரியுள்ள பின்னணியில் எரிபொருள் நெருக்கடி காரணமாக பாடசாலை வர முடியாத ஆசிரியர்களுக்கு தனிப்பட்ட விடுமுறையில் பதியப்படும் என அச்சுறுத்தல் விடுக்க அதிபர்களுக்கு அதிகாரம் இல்லை என்றும், அவ்வாறு அச்சுறுத்தல் விடுப்பது பிரச்சினையை ஏற்படுத்தும் என்றும் மகிந்த ஜயசிங்க தெரிவித்துள்ளார்.


இன்று காலை முகநூல் நேரலையில் உரையாற்றும் போது, அவ்வாறு பல பிரதேசங்களில் அதிபர்கள் அச்சுறுத்தல் விடுத்து தேவையற்ற நெருக்கடிகளை தோற்றுவித்துள்ளதாக அவர் சுட்டிக் காட்டினார்.

போக்குவரத்து பிரச்சினை காரணமாக ஆசிரியர்களுக்கு சலுகை வழங்கல்..!

நாட்டில் நிலவும் போக்குவரத்து பிரச்சினை காரணமாக ஆசிரியர்களுக்கு சலுகை வழங்ககும் விதமாக, பின்வரும் நிபந்தனைகளுக்கு உட்பட்ட வகையில் குறித்த ஆசிரியர்களின் கோரிக்கைகளை கவனத்திற் கொண்டு வசதியான பாடசாலைக்கு தற்காலிக சேவை இணைப்பை வழங்க அறிவுறுத்தல்கள் வழங்கப்பட்டுள்ளன.

கல்வி அமைச்சினால் மாகாண அரச சேவை ஆணைக்குழு செயலாளர்களுக்கும், மாகாண கல்விச் செயலாளர்களுக்கும், மாகாண கல்விப் பணிப்பாளர்களுக்கும், வலயக்கல்விப் பணிப்பாளர்களுக்கும், தேசிய பாடசாலை அதிபர்களுக்கும் கடிதம் மூலம் அறிவிக்கின்றது.


அடிப்படை விடயங்கள்

குறித்த மாகாணத்தில் உள்ள தேசிய பாடசாலைகளுக்கிடையில் மற்றும் தேசிய – மாகாண பாடசாலைகளுக்கிடையில் ஆசிரியர்களை இணைப்புச் செய்யும் அதிகாரம் குறித்த மாகாண கல்விப் பணிப்பாளருக்கு வழங்கப்படுகின்றது.

மாகாணங்களுக்கிடையில் மாகாண பாடசாலைகளுக்கிடையிலான இணைப்பை வழங்கும் அதிகாரம் குறித்த மாகாண மாகாண அரச சேவை ஆணைக்குழுவின் செயலாளரின் பணிப்புரையின் கீழ் வழங்கப்படல் வேண்டும்.


மாகாணங்களுக்கிடையிலான தேசிய பாடசாலை இணைப்புக்கு கல்வி அமைச்சின் ஆசிரிய இடமாற்ற கல்விப் பணிப்பாளரின் மூலம் வழங்கப்படல் வேண்டும்.

மேற்படி அனைத்து இணைப்புகளும், பாடசாலை கற்றல் கற்பித்தல் செயற்பாடுகளுக்கு இடையூறாக அமையாத வண்ணம், குறித்த இரண்டு பாடசாலை அதிபர்களினதும் எழுத்து மூல அங்கீகரிப்புடன் மாத்திரம் மேற்கொள்ளப்படல் வேண்டும்.

நிபந்தனைகள்

குறித்த ஆசிரியர் பாடசாலையில் மேலதிகம் எனின், அவருக்கான பிரதியீட்டாளர் அவசியமில்லை
குறித்த ஆசிரியர் மேலதிமானவர் இல்லை எனின், பொருத்தமான பிரதியீட்டாளரை வழங்கிய பின்னர் இணைப்பு வழங்கப்படல் வேண்டும்.

அதிபர்களின் ஒருமைப்பாட்டுடன் மேற்கொள்ளப்படும் பரஸ்பர இடமாற்றம் நடைபெறுவது போன்று, அதனை அடிப்படையாகக் கொண்டு இணைப்புகள் மேற்கொள்ளப்படல் வேண்டும்.


கர்ப்பிணிகளுக்கான இணைப்பு குறித்த வைத்திய பணிப்புரையின் பேரில், வைத்திய சான்றிதழுடன் 2007/20 சுற்றறிக்கையின் 3,4,II இன் பிரகாரம் வழங்கப்படல் வேண்டும்.

மாகாண கல்விப் பணிப்பாளரினால் தேசிய பாடசாலை ஆசிரியர்களுக்கு வழங்கப்புட் இணைப்புக் கடித பிரதி கல்வி அமைச்சின் கல்விப் பணிப்பாளர் (ஆசிரியர் இடமாற்றம்) இற்கு அனுப்பப்படல் வேண்டும்.

இணைப்புகள் யாவும் 31.12.2022 வரை மாத்திரம் வழங்கப்படல் வேண்டும். மேற்படி இணைப்புகள் குறித்த பாடசாலைக்கு இடமாற்றம் கிடைப்பதற்கான உத்தரவாதம் அற்றதுடன் குறித்த ஆசிரியரின் சம்பளம் நிலையான சேவை நிலையத்திற்கே வழங்கப்படும்.

பாடசாலைகளில் கடமையாற்றும் கல்வி சாரா ஊழியர்களின் கடமை நேரம் குறைப்பு..!

நாட்டில் நிலவும் எரிபொருள் தட்டுப்பாடு மற்றும் போக்குவரத்து பிரச்சினை காரணமாக தேசிய பாடசாலைகளில் கடமையாற்றும் கல்விசாரா ஊழியர்களுக்கு நிவாரணம் கல்வி அமைச்சு முடிவு செய்துள்ளது.


அந்த வகையில் எதிர்வரும் டிசம்பர் 31 அல்லது மீண்டும் குறிப்பிடப்படும் தினம் வரை அவர்களின் கடமை நேரம் 2 மணி வரை மட்டுப்படுத்தப் படுகின்றது எனக் குறிப்பிடப்பட்டுள்ளது.


கல்வியியல் கல்லூரி ஆசிரிய நியமனத்தின் போது பாடசாலைத் தெரிவு இல்லை; இறுதிப் பரீட்சை ஒக்டோபரில்..!

தேசிய கல்வியியல் கல்லூரிகள் 2018 – 2020 இன் கட்டுறுப் பயிற்சி குழுவின் இறுதிப் பரீட்சை வரும் அக்டோபரில் நடத்த உத்தேசிக்கப்பட்டுள்ளது என்று கல்வி அமைச்சின் கல்வியியல் கல்லூரி பிரிவின் மூத்த அதிகாரி ஒருவர் தெரிவித்துள்ளார்.

இதேவேளை, கடந்த வாரம் ஆசிரியர் சங்கப் பிரதிநிதிகளுக்கும், கல்வி அமைச்சர் மற்றும் கல்வி அமைச்சின் அதிகாரிகளுக்கும் இடையில் இடம்பெற்ற கலந்துரையாடலின் போது,

​​2023 ஆம் ஆண்டு புதிதாக நியமனம் செய்யவுள்ள கல்வியியல் கல்லூரி ஆசிரியர்களை பிரபல பாடசாலைகளுக்கு நியமிப்பதில்லை என தீர்மானிக்கப்பட்டுள்ளதாக அமைச்சர் சுசில் பிரேமஜயந்த தெரிவித்துள்ளார்.


வடக்கு மற்றும் கிழக்கில் பாடசாலை அடிப்படையில் நியமனங்கள் வழங்கப்படவுள்ளதாக தெரிவிக்கப்படுகின்றது.

அதன் பிரகாரம் புதிய ஆசிரியர்கள் தாங்கள் விரும்பும் பாடசாலைகளுக்கு விண்ணப்பிப்பதற்கான சந்தர்ப்பம் வழங்கப்படாது எனவும், கட்டாயமாக பணிபுரியும் அடிப்படையில் நியமனம் வழங்கப்படும் என்றும் தெரிவிக்கப்பட்டுள்ளது. இவர்கள் 5 ஆண்டுகள் கிராமப் புறங்களில் பணிபுரியும் வகையில் இச்சந்தர்ப்பம் வழங்கப்படும் என அமைச்சர் தெரிவித்துள்ளார்.


எதிர்வரும் 2019 மற்றும் 2020 ஆம் ஆண்டுக்கான உயர்தரப் பரீட்சை பெறுபேறுகளின் அடிப்படையில் புதிய ஆசிரிய மாணவர்களை ஆட்சேர்ப்பு விரைவில் செய்யப்படும் என அமைச்சர் மேலும் தெரிவித்துள்ளார்.

தென்னிலங்கையில் மாயமான தமிழ் சிறுமி யாழில் கண்டுபிடிப்பு..!

கண்டி- கலஹா- ஹயிட் தோட்டத்தில் காணாமல் போன 14 வயது சிறுமி, 6 நாள்களின் பின்னர் யாழில் கண்டு பிடிக்கப்பட்டுள்ளதாக கலஹா பொலிஸார் தெரிவித்தனர்.

இராசலிங்கம் பிரியதர்சினி என்ற 14 வயது சிறுமியே இவ்வாறு யாழ் பஸ் தரிப்பிடத்திலிருந்து 11ஆம் திகதி காலை கண்டு பிடிக்கப்பட்டுள்ளார்.


குறித்த சிறுமி காணாமல் போனமை தொடர்பில், ஊடகங்களில் வெளியான செய்தியை அவதானித்த வர்த்தகர் ஒருவர், சிறுமி பஸ் தரிப்பிடத்தில் இருப்பதை அவதானித்து யாழ்ப்பாணம் பொலிஸ் நிலையத்துக்கு அறிவித்துள்ளார்.

இதனையடுத்து மீட்கப்பட்ட சிறுமி கலஹா பொலிஸ் நிலையத்தில் ஒப்படைக்கப்பட்டுள்ளதுடன், அவரிடம் வாக்குமூலம் பெறப்பட்டு, அவர் கண்டி வைத்தியசாலையில் வைத்திய பரிசோதனைக்காக அனுமதிக்கப் பட்டுள்ளதாகவும் கூறப்படுகின்றது.


அத்துடன் நாளை நீதிமன்ற வைத்தியரிடம் முன்னிலைப்படுத்தப்பட உள்ளதாகவும் கலஹா பொலிஸார் தெரிவித்தனர்.

குறித்த சிறுமி யாழ்ப்பாணத்திலுள்ள தனது நண்பியைத் தேடிச் சென்றதாகவும், செல்லும் வழியில் தனது அலைபேசி செயலிழந்ததால் நண்பியுடன் தொடர்பு கொள்ள முடியாமல், பஸ் தரிப்பிடத்தில் காத்திருந்ததாகவும் பொலிஸாரிடம் தெரிவித்துள்ளதாக கூறப்படுகின்றது.

அரச உத்தியோகத்தர்களுக்கு சம்பளமற்ற வெளிநாட்டு விடுமுறையை வழங்க அமைச்சரவை அனுமதி..!

தொழில் புரிவதற்கோ அல்லது வேறு பயன்மிக்க பணிகளில் ஈடுபடுவதற்காக அரச உத்தியோகத்தர்களுக்கு சம்பளமற்ற வெளிநாட்டு விடுமுறையை வழங்குவதற்கு அரசாங்கம் தீர்மானித்துள்ளது.

கல்வி அல்லது வெளிநாட்டு வேலைவாய்ப்புக்காக அரச உத்தியோகத்தர் ஒருவர் தனது பணிக் காலத்தில் உயர்ந்தபட்சம் 5 வருடங்கள் சம்பளமற்ற விடுறையைப் பெற்றுக் கொள்வதற்கு தற்போது ஏற்பாடுகளின் பிரகாரம் இயலுமை உள்ளது.


ஆனாலும், குறித்த காலப் பகுதியில் ஓய்வூதியக் கணிப்பைக் கருத்தில் கொள்ளாமை, சிரேஷ்டத்துவத்தை பாதிக்கின்றமை மற்றும் ஏனைய நிபந்தனைகளால் அரச உத்தியோகத்தர்கள் அவ்வாறான விடுமுறையைப் பெறுவதில் ஆர்வம் காட்டுவதில்லை.


நாட்டில் தற்போது நிலவுகின்ற பொருளாதார நிலைமையைக் கருத்தில் கொண்டு, அரச உத்தியோகத்தர்களுக்கு வெளிநாட்டு வேலை வாய்ப்புக்களில் தொழில் புரிவதற்கோ அல்லது வேறு பயனுறுதிவாய்ந்த பணிகளில் ஈடுபடுவதற்காக அவர்களின் சிரேஷ்ட்டத்துவம் மற்றும் ஓய்வூதியத்திற்குப் பாதிப்பு ஏற்படாத வகையில் தற்போதுள்ள ஏற்பாடுகளில் திருத்தம் செய்யப்பட்டு குறித்த சுற்றறிக்கை ஆலோசனைகளை வெளியிடுவதற்கு அமைச்சரவை அங்கீகாரம் வழங்கியுள்ளது.

தரம் ஒன்றிற்கு மாணவர்களை இணைத்து கொள்வதற்கு புதிய சுற்று நிரூபம்..!

பாடசாலைகளில் முதலாம் தரத்திற்கு மாணவர்களை இணைத்துக் கொள்வதற்காக புதிய சுற்று நிரூபத்தினை வெளியிடுவதற்கு அரசாங்கம் தீர்மானித்துள்ளது.

இது தொடர்பில் இதற்கு முன்னர் வெளியிடப்பட்ட சுற்றறிக்கையை நடைமுறைப்படுத்தும் போது எழுந்த பிரச்சினைகள் தொடர்பாக அதிபர்கள், சுற்றறிக்கை திருத்தக் குழு, அமைச்சின் விசாரணைப் பிரிவு, இலஞ்சம் மற்றும் ஊழல் பற்றிய சாத்துதல்களை புலனாய்வு செய்வதற்கான ஆணைக்குழு மற்றும் தேர்தல்கள் ஆணைக்குழு உள்ளிட்ட பல்வேறு தரப்பினர்களால் பல கருத்துக்கள் முன்வைக்கப்பட்டன.


இவர்களால் முன்வைக்கப்பட்டுள்ள விடயங்களோடு, அது தொடர்பான நீதிமன்றத் தீர்ப்புக்களையும் கருத்தில் கொண்டு, திருத்தப்பட்ட புதிய சுற்றறிக்கையொன்று கல்வி அமைச்சால் தயாரிக்கப்பட்டுள்ளது.


அதற்கமைய 2023 ஆண்டு தொடக்கம் தொடர்ந்து வரும் காலங்களில் பாடசாலைகளில் முதலாம் தரத்திற்கு மாணவர்களை இணைத்துக் கொள்வதற்காக குறித்த திருத்தப்பட்ட சுற்றறிக்கையில் குறிப்பிடப்பட்டுள்ள உட்பிரிவுகளை ஏற்புடையதாக்கிக் கொள்வதற்காக கல்வி அமைச்சர் சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

வெள்ளி அரச ஊழியர்களுக்கு பொது விடுமுறை; பாடசாலைகள் புறக்கணிப்பு..!

இந்த வாரத்தில் இருந்து அரச ஊழியர்களுக்கு வெள்ளிக் கிழமைகளை விடுமுறை தினமாக பிரகடனப்படுத்துவதற்கு அமைச்சரவை அங்கீகாரம் வழங்கியுள்ளது. பொது நிர்வாக, உள்நாட்டலுவல்கள், மாகாண சபைகள் மற்றும் உள்ளூராட்சி அமைச்சர் தினேஷ் குணவர்தன சமர்ப்பித்த யோசனைக்கு அமைச்சரவை அங்கீகாரம் வழங்கியுள்ளது.

இதன்போது நீர் வழங்கல், சுகாதாரம், மின்சார விநியோகம், கல்வி, பாதுகாப்பு சேவைகள், போக்குவரத்து மற்றும் பிற அத்தியாவசிய சேவைகள் இதில் உள்ளடங்காது என தெரிவிக்கப்பட்டுள்ளது.


தற்பொழுது நிலவும் எரிபொருள் தட்டுப்பாட்டின் காரணமாக பயணிகளுக்கு கடுமையான போக்குவரத்து பாதிப்புகள் ஏற்பட்டுள்ளன. இதனால், அரச ஊழியர்களுக்கும் போக்குவரத்து வசதிகளை பெற்றுக்கொள்வதில் சிரம் ஏற்பட்டுள்ளது.

இதன் காரணமாக வாரத்தில் கடமையாற்றும் ஒருநாளை அரச விடுமுறை தினமாக வழங்கத் தீர்மானிக்கப்பட்டுள்ளது.


இதேவேளை, உணவுத் தட்டுப்பாட்டுக்குத் தீர்வாக தமது வீட்டுத் தோட்டங்களில் அல்லது வேறு இடங்களில் விவசாய நடவடிக்கைகளில் ஈடுபடுவதற்கு அவர்களுக்கான வசதிகளை வழங்குவது தொடர்பிலும் கவனம் செலுத்தப்பட்டுள்ளது.

முழுமையாக முடங்கும் தனியார் பேருந்து சேவை; பாடசாலைகள் முழுமையாக முடங்கும் அபாயம்..!

நாட்டில் தற்பாது நிலவும் டீசல் தட்டுப்பாடு காரணமாக, அடுத்த வாரத்தில் தனியார் பேருந்து சேவை முழுைமயாக முடங்கும் என இலங்கை தனியார் பேருந்து உரிமையாளர் சங்கத்தின் தலைவர் கெமுனு விஜேரத்ன தெரிவித்துள்ளார்.

“இலங்கை போக்குவரத்துச் சபையினால் வழங்கப்படும் டீசல் தற்போது பற்றாக்குறையாக உள்ளது. டீசல் இன்மையால், நேற்றைய தினம் பெருமளவான பேருந்துகள் சேவையில் ஈடுபடவில்லை.


நாளைய தினம் இந்த நிலைமை மேலும் உக்கிரமடையும். எரிபொருள் வழங்கப்படாமையால் அடுத்த வாரம் தனியார் பேருந்து சேவை முழுமையாக முடங்கும்” என எச்சரித்துள்ளார்.

இதேவேளை அடுத்த வாரத்தில் பாடசாலை போக்குவரத்து சேவைகளும் கைவிடப்படும் அபாயம் உள்ளதாக அகில இலங்கை பாடசாலை போக்குவரத்து சேவை சங்கத்தின் தலைவர் டி சில்வா தெரிவித்துள்ளார்.


டீசலை பெற்றுக்கொள்வது கடினமாக உள்ளது எனவும் அதன் காரணமாக பாடசாலை பேருந்து சேவையில் இருந்து பலர் விலகியுள்ளதாக தெரிவித்தார்.

இதேவேளை தனியார் பேரூந்துகள் முடங்குவதாலும், எரிபொருள் தட்டுப்பாடு, எரிபொருள் உட்பட பொருட்கள் விலையேற்றத்தாலும் பாடசாலைகள் முழுமையாக முடங்கும் அபாய நிலை காணப்படுகின்றது என்பதும் குறிப்பிடத்தக்கது.

CIRCULARS

HOT JOBS

Recent Posts

ADVANCED LEVEL EDUCATION

SECONDARY EDUCATION

PRIMARY EDUCATION

Block title

0FansLike
0SubscribersSubscribe